യു.ഡി.എഫ് മാനിഫെസ്റ്റോയും കേരളത്തിലെ വിദ്യാഭ്യാസ ഭാവിയും 3

സി മുഹമ്മദ് അജ്മൽ

2026 ജൂലൈ 04, 1448 മുഹർറം 19

കോച്ചിങ് മേഖല വളരുന്നത് എന്തുകൊണ്ടാണ്?

സ്‌കൂളിൽ പഠിപ്പിക്കുന്നതും മത്സരപ്പരീക്ഷകൾ ആവശ്യപ്പെടുന്നതും തമ്മിൽ വലിയ വ്യത്യാസ മുള്ളതിനാലാണ് കോച്ചിങ് മേഖല വളരുന്നത്! സ്‌കൂളുകളിൽ ശരിയായ ആഴത്തിലും കൃത്യതയിലും പഠിപ്പിച്ചാൽ കോച്ചിങ്ങിനെ ആശ്രയിക്കുന്നത് സ്വാഭാവികമായി കുറയും. അതുകൊണ്ട് സർക്കാർ കോച്ചിങ് പരിപാടി മാത്രം പരിഹാരമാകില്ല.

കേരളത്തിന് യഥാർഥത്തിൽ വേണ്ടത് എന്താണ്?

1. പ്രൈമറി ഗണിതവിദ്യാഭ്യാസം അടിയന്തരമായി പരിഹരിക്കണം.

അഞ്ചാം ക്ലാസിലെ ഹരണശേഷി 45.9%ൽനിന്ന് 21%ലേക്ക് ഇടിഞ്ഞത് ഒരു ചെറിയ ആശങ്കയല്ല. ഇതൊരു പ്രതിസന്ധിയാണ്. കേരളത്തിന് ഒന്നു മുതൽ അഞ്ച് വരെയുള്ള ക്ലാസുകളിൽ അടിസ്ഥാന ഗണിതശേഷി വീണ്ടെടുക്കാൻ യുദ്ധകാലാടിസ്ഥാനത്തിലുള്ള പരിപാടികൾ വേണം. ഗണിതം പഠിപ്പിക്കുന്ന രീതിതന്നെ മാറ്റണം.

• മനപ്പാഠമാക്കുന്ന രീതി കുറയ്ക്കുക.

• കൂടുതൽ സംഖ്യാബോധം.

• കൂടുതൽ കണക്കുകൂട്ടലുകൾ.

• കൂടുതൽ മനക്കണക്ക്.

• കൂടുതൽ പ്രശ്‌നപരിഹാര ശേഷി.

• കൂടുതൽ ആശയപരമായ ധാരണ.

ഇത് ഗംഭീരമായ ഒരു പരിഷ്‌കാരമല്ല. ഇതിന് വലിയ ഉദ്ഘാടന മഹാമഹങ്ങൾ നടത്താനാകില്ല. ‘മൂന്നാം ക്ലാസിലെ കുറയ്ക്കൽ മെച്ചപ്പെടുത്തൽ ദൗത്യം’ എന്നത് വലിയ വാർത്തയാകില്ല. പക്ഷേ, ഇതാണ് ഏറ്റവും പ്രധാനപ്പെട്ട പരിഷ്‌കാരം. അടിത്തറയില്ലാതെ ഐ.ഐ ഡിപ്പാർട്ട്‌മെന്റ്, നോളജ് സിറ്റി, NEET/JEE കോച്ചിങ് എല്ലാം മണലിന്മേൽ കെട്ടിയ കെട്ടിടം പോലെയായിരിക്കും.

2. മാർക്ക് പെരുപ്പിച്ചു കാണിക്കുന്നത് അവസാനിപ്പിക്കണം.

CUET വന്നത് കേരളത്തിന് വലിയൊരു തിരിച്ചറിവ് നൽകി. കേരള ബോർഡ് മാർക്കുകൾ യഥാർഥ യോഗ്യതയുമായി ബന്ധമില്ലാത്തതായി മാറിക്കൊണ്ടിരിക്കുകയാണ് എന്ന് അത് തെളിയിച്ചു. പുതിയ സർക്കാർ പരീക്ഷാ മൂല്യനിർണയ നിലവാരം കൂടുതൽ കർശനമാക്കണം. ചോദ്യപേപ്പറുകൾ ഓർമശക്തി മാത്രം പരിശോധിക്കുന്നതാകരുത്. മൂല്യനിർണയം വെറുതെ മാർക്ക് വാരിക്കോരി നൽകു ന്നതാകരുത്. കൃത്യമായ മാനദണ്ഡങ്ങൾ വേണം. മാർക്കുകൾ യഥാർഥ കഴിവ് പ്രതിഫലിപ്പിക്കണം.

അതെ, ആദ്യ വർഷങ്ങളിൽ ശരാശരി മാർക്ക് കുറയാം. രക്ഷിതാക്കൾ പരിഭ്രാന്തരാകാം. രാഷ്ട്രീയ സമ്മർദം വരാം. പക്ഷേ, അതാണ് സത്യസന്ധമായ പരിഷ്‌കാരം. മാർക്ക് കുറയുന്നത് പ്രശ്‌നമല്ല. തെറ്റായ ആത്മവിശ്വാസമാണ് പ്രശ്‌നം.

3. ഹൈസ്‌കൂൾ മുതൽ ബേസിക്/അഡ്വാൻസ്ഡ് ട്രാക്കുകൾ വേണം.

CBSE 2020 മുതൽ പത്താം ക്ലാസ് ഗണിതത്തിൽ രണ്ട് ഓപ്ഷനുകൾ നൽകുന്നുണ്ട്:

മാത്തമാറ്റിക്‌സ് ബേസിക് (Mathematics Basic).

മാത്തമാറ്റിക്‌സ് സ്റ്റാൻഡേർഡ് (Mathematics Standard).

ഒരേ സിലബസ്. ഒരേ പാഠപുസ്തകങ്ങൾ. പക്ഷേ, പരീക്ഷയുടെ കാഠിന്യം വ്യത്യസ്തം. സയൻസ്, എഞ്ചിനീയറിങ്, മത്സരപ്പരീക്ഷാ വഴികൾ നോക്കുന്നവർക്ക് സ്റ്റാൻഡേർഡ്. ഹ്യൂമാനിറ്റീസ്, കൊമേഴ്‌സ്, കലകൾ, ഇതര ശാസ്ത്രവിഷയങ്ങൾ നോക്കുന്നവർക്ക് ബേസിക്. കേരള സിലബസിലും ഇത് കൊണ്ടുവരാം. എല്ലാ വിദ്യാർഥികൾക്കും ഒരേ നിലവാരത്തിലുള്ള ഗണിതം വേണ്ട. ഒരു ഭാവി എഞ്ചിനീയർക്ക് വേണ്ട ഗണിത കാഠിന്യവും, ഒരു ഭാവി ഹ്യൂമാനിറ്റീസ് വിദ്യാർഥിക്ക് വേണ്ട ഗണിത ആവശ്യകതയും ഒരുപോലെയല്ല.

എല്ലാവരെയും ഒരേ വഴിയിലൂടെ തള്ളുമ്പോൾ രണ്ട് നഷ്ടങ്ങൾ സംഭവിക്കുന്നു. ആഴം ആവശ്യമുള്ള വിദ്യാർഥികൾക്ക് മതിയായ വെല്ലുവിളി ലഭിക്കുന്നില്ല. ആഴം ആവശ്യമില്ലാത്ത വിദ്യാർഥികൾ അനാവശ്യ സമ്മർദം അനുഭവിക്കുന്നു.

ബേസിക്/അഡ്വാൻസ്ഡ് ട്രാക്ക് അസമത്വം ഉണ്ടാക്കാനല്ല; വ്യത്യസ്തമായ തൊഴിൽ വഴികൾക്ക് വ്യത്യസ്തമായ ഒരുക്കം നൽകാനാണ്. ഇത് പ്രായോഗികമാണ്. നീതിയുക്തമാണ്. കോച്ചിങ്ങിന്റെ ആവശ്യം കുറയ്ക്കാനും സഹായിക്കും.

4. ആന്തരിക മാർക്കുകളല്ല, ബാഹ്യമായ അളവുകോലുകൾ നോക്കണം.

കേരളം സ്വന്തം ബോർഡ് പരീക്ഷാ വിജയശതമാനം നോക്കി സന്തോഷിക്കുന്നത് നിർത്തണം. AS, ASER, CUET പ്രകടനങ്ങൾ, JEE/NEET യോഗ്യതാ നിരക്കുകൾ, സംസ്ഥാന തലത്തിലുള്ള സ്വതന്ത്ര വിലയിരുത്തലുകൾ; ഇവയെ അടിസ്ഥാനമാക്കി വിദ്യാഭ്യാസ ഗുണനിലവാരം അളക്കണം.

5. അടിത്തറ ശരിയായ ശേഷം മാത്രം മത്സരപ്പരീക്ഷാപരിശീലനം നൽകണം.

അടിത്തറ ശരിയായാൽ സർക്കാർ സ്‌കൂളുകളിലെ മത്സരപ്പരീക്ഷാ പരിശീലനം വളരെ ഉപകാരപ്പെടും. പക്ഷേ, അത് ഒമ്പതാം ക്ലാസിൽ പെട്ടെന്നൊരു കോച്ചിങ് ആയി തുടങ്ങരുത്. ആറാം ക്ലാസ് മുതൽ ആശയപരമായ ആഴം വളർത്തണം. പ്രത്യേകം പരിശീലനം ലഭിച്ച കോച്ചുകൾ വേണം. സാധാരണ അധ്യാപകരുടെ മേൽ അധിക ബാധ്യതയായി ഇടരുത്. ഫലം അളക്കേണ്ടത് പ്രവേശന നിരക്കുകൾ ഉപയോഗിച്ചാണ്, പങ്കാളിത്തത്തിന്റെ എണ്ണം നോക്കിയല്ല.

ആറാം ക്ലാസ് മുതൽ യഥാർഥ ആശയപരമായ ആഴം വളർത്തുക. അപ്പോൾ പത്താം ക്ലാസ് ആകുമ്പോഴേക്കും മത്സരപ്പരീക്ഷാരീതികൾ കുട്ടികൾക്ക് അപരിചിതമായി തോന്നില്ല. സർക്കാർ സ്‌കൂൾ വ്യവസ്ഥിതി ഇതേ രീതിയിൽ പ്രവർത്തിച്ചാൽ, ഏറ്റവും നല്ല ലക്ഷ്യം കോച്ചിങ് എല്ലാവർക്കും നൽകുക എന്നതല്ല, കോച്ചിങ് വേണ്ടാത്ത തരത്തിൽ സ്‌കൂൾ വിദ്യാഭ്യാസം ശക്തമാക്കുക എന്നതാണ്.

യുഡിഎഫ് സർക്കാർ ഈ വാഗ്ദാനം ഗൗരവമായി എടുക്കുന്നുവെങ്കിൽ, വോട്ടർമാർ ശ്രദ്ധിക്കേണ്ട ചില നാഴികക്കല്ലുകൾ:

1. എല്ലാ ജില്ലകളിലും അടിസ്ഥാന സാക്ഷരത, ഗണിതശേഷി എന്നിവയിൽ സ്വതന്ത്ര വിലയിരുത്തൽ നടത്തണം. ഫലങ്ങൾ പൊതുജനങ്ങൾക്ക് ലഭ്യമാക്കണം. ബോർഡ് വിജയശതമാനമല്ല, ASER/NAS മാതൃകയിലുള്ള സൂചികകൾ അടിസ്ഥാനമാക്കിയുള്ള ലക്ഷ്യങ്ങൾ പ്രഖ്യാപിക്കണം.

2. 500 സ്‌കൂളുകളിൽ ബേസിക്/അഡ്വാൻസ്ഡ് ട്രാക്ക് പരീക്ഷണാടിസ്ഥാനത്തിൽ തുടങ്ങണം. ബോർഡ് മൂല്യനിർണയ നിലവാരം കർശനമാക്കണം. പ്രാഥമിക ഗണിത പരിഹാര പദ്ധതികൾ സംസ്ഥാന വ്യാപകമായി ആരംഭിക്കണം.

3. അഞ്ചാം ക്ലാസിലെ ഹരണശേഷി 21%ൽനിന്ന് കുറഞ്ഞത് 35%ലേക്ക് ഉയരുന്ന ദിശയിൽ അളക്കാവുന്ന പുരോഗതി കാണണം. ബേസിക്/അഡ്വാൻസ്ഡ് ട്രാക്ക് എല്ലാ സ്‌കൂളുകളിലേക്കും വ്യാപി പ്പിക്കണം.

4. കേരളത്തിന്റെ പത്താം ക്ലാസ് ഗണിത NAS സ്‌കോർ ദേശീയ ശരാശരിക്ക് മുകളിൽ എത്തണം. CUET പ്രകടനം മെച്ചപ്പെടണം. അതിനുശേഷം NEET/JEE ഫൗണ്ടേഷൻ കോഴ്‌സ് ഫലങ്ങൾ വിലയിരുത്തണം.

കേരളത്തിന്റെ വിദ്യാഭ്യാസ പ്രതിസന്ധി കോച്ചിങ് ചെലവേറിയതാണ് എന്നതല്ല. കേരളത്തിന്റെ വിദ്യാഭ്യാസ പ്രതിസന്ധി സ്‌കൂൾ വ്യവസ്ഥിതി കുട്ടികളെ ശക്തമായി പഠിപ്പിക്കുന്നില്ല എന്നതാണ് അതേസമയം മാർക്കുകൾ ഉയർന്നുകൊണ്ടിരിക്കുന്നു എന്നതാണ്.

• ASER വിവരങ്ങൾ അടിസ്ഥാന ഗണിതത്തിന്റെ തകർച്ച കാണിക്കുന്നു.

• CUET മാർക്ക് പെരുപ്പിച്ചു കാണിക്കുന്ന രീതി പുറത്തുകൊണ്ടുവന്നു.

• NAS കേരളം ഗണിതത്തിൽ ദേശീയ ശരാശരിക്ക് താഴെയാണെന്ന് കാണിച്ചു.

• JEE/NEET മുൻനിര റാങ്കുകളിൽ കേരളത്തിന്റെ സാന്നിധ്യം വളരെ കുറവാണ്.

ഇതെല്ലാം നടക്കുമ്പോഴും ബോർഡ് പരീക്ഷാ വിജയശതമാനം ഉയരുന്നു. എപ്ലസ് എണ്ണം ഉയരുന്നു. 90%ൽ കൂടുതൽ മാർക്ക് സാധാരണമായി മാറുന്നു. ഇത് മികവല്ല. ഇത് മികവിന്റെ ഭ്രമമാണ് (illusion of excellence).

സർക്കാർ സ്‌കൂളുകളിൽ NEET/JEE കോച്ചിങ് നല്ല ആശയമാണ്. പക്ഷേ, അത് മുകളിലത്തെ നിലയുടെ നവീകരണമാണ്. താഴത്തെ നില തകർന്നുകൊണ്ടിരിക്കുമ്പോൾ ആദ്യം അടിത്തറ ശരിയാക്ക ണം. പരീക്ഷകൾ സത്യസന്ധമാക്കണം. വിദ്യാർഥികൾക്ക് അനുയോജ്യമായ ആഴം തിരഞ്ഞെടുക്കാൻ അവസരം നൽകണം. യഥാർഥ നിലവാരവുമായി താരതമ്യം ചെയ്യണം. അതിനുശേഷം കോച്ചിങ് കൊണ്ടുവരണം.

(ഇത് യുഡിഎഫ് വിദ്യാഭ്യാസ പ്രകടനപത്രിക പരമ്പരയുടെ രണ്ടാം ഭാഗമാണ്. ഈ പരമ്പരയിൽ ഞാൻ യുഡിഎഫ് മാനിഫെസ്റ്റോയിലെ വിദ്യാഭ്യാസ നിർദേശങ്ങളെ രാഷ്ട്രീയമായല്ല, നയപരമായ കാഴ്ചപ്പാടോടെയാണ് പരിശോധിക്കുന്നത്. നല്ല ആശയങ്ങളെ അംഗീകരിക്കും. പ്രായോഗികമല്ലാത്തതിനെ ചോദ്യം ചെയ്യും. വെല്ലുവിളികൾ ചൂണ്ടിക്കാണിക്കും. പരിഹാരങ്ങൾ നിർദേശിക്കും. കാരണം വിദ്യാഭ്യാസത്തെക്കുറിച്ചുള്ള പൊതുചർച്ചകൾ മുദ്രാവാക്യങ്ങളിൽനിന്ന് വ്യവസ്ഥാപിത ചിന്തകളിലേക്ക് മാറേണ്ടസമയമാണിത്.)