1) ക്വുര്‍ആനിന്റെ ഉന്നതമായ മഹത്ത്വത്തെയും ശ്രേഷ്ഠതയെയും വ്യക്തമാക്കിക്കൊണ്ട് അല്ലാഹു പറയുന്നു: ''തീര്‍ച്ചയായും നാം ഇതിനെ (ക്വുര്‍ആനിനെ) നിര്‍ണയത്തിന്റെ രാത്രിയില്‍ അവതരിപ്പിച്ചിരിക്കുന്നു.'' മറ്റൊരു സ്ഥലത്ത് അല്ലാഹു പറയുന്നു: ''തീര്‍ച്ചയായും നാം അതിനെ അനുഗൃഹീത രാത്രിയില്‍ അവതരിപ്പിച്ചിരിക്കുന്നു'' (44:3). ക്വുര്‍ആനിന്റെ അവതരണം ആരംഭിച്ചത് റമദാനിലെ ലൈലതുല്‍ ക്വദ്‌റിലാണ്. മഹത്തായ ഈ രാത്രിയെ നിശ്ചയിച്ചു തന്നതിലൂടെ നന്ദി ചെയ്താല്‍ തീരാത്ത വിധം അല്ലാഹു തന്റെ അടിമകള്‍ക്ക് അതിവിശാലമായ അനുഗ്രഹമാണ് നല്‍കിയത്. ലൈലതുല്‍ക്വദ്ര്‍ എന്ന് ഈ രാത്രിക്ക് പേരു നല്‍കാന്‍ കാരണം അതിന് അല്ലാഹുവിന്റെ അടുക്കലുള്ള ശ്രേഷ്ഠതയും അതിന്റെ അതിമഹത്ത്വവുമാണ്. കാരണം ആ വര്‍ഷത്തില്‍ സംഭവിക്കാനിരിക്കുന്ന മനുഷ്യന്റെ അവധി, ഉപജീവനം, വിധി സംബന്ധമായ കാര്യങ്ങള്‍ എന്നിവ അന്ന് നിര്‍ണയിക്കപ്പെടുന്നു.

2) പിന്നീട് അതിന്റെ മഹത്ത്വത്തെ ഒന്നുകൂടി ഉന്നതമാക്കിയും അതിന്റെ കാര്യം ശക്തിപ്പെടുത്തിയും അല്ലാഹു പറയുന്നു: ''ലൈലതുല്‍ ക്വദ്ര്‍ എന്നാല്‍ എന്താണെന്ന് നിനക്കറിയാമോ?'' അതായത്, അതിന്റെ കാര്യം മഹത്ത്വമേറിയതും ഉന്നതവുമാണ്.

3) ''ലൈലതുല്‍ ക്വദ്ര്‍ ആയിരം മാസത്തെക്കാള്‍ ഉത്തമമാകുന്നു.'' അതിന് ആയിരം മാസങ്ങള്‍ക്കു സമാനമായ മഹത്ത്വമുണ്ട്. ആ രാത്രിയില്‍ സംഭവിക്കുന്ന ഒരു കര്‍മത്തിന് മറ്റു രാത്രികളില്‍ ചെയ്യുന്ന കര്‍മത്തെക്കാള്‍ ആയിരം മാസങ്ങള്‍ക്കു തുല്യമായ പ്രതിഫലമുണ്ട്. ബുദ്ധിയും ചിന്തയും പരിഭ്രമിച്ചുപോകുന്ന ഒരു വസ്തുതയാണിത്. ദുര്‍ബലമായ ഈ സമുദായത്തിന് അല്ലാഹു നല്‍കിയ മഹത്തായൊരനുഗ്രഹം. ആയിരം മാസങ്ങളെക്കാള്‍ വര്‍ധിച്ച പ്രതിഫലം നിശ്ചയിക്കുന്നതിലൂടെ ദുര്‍ബല സമുദായത്തെ അല്ലാഹു ശക്തിപ്പെടുത്തി. ദീര്‍ഘായുസ്സ്‌ലഭിക്കുന്ന ഒരു വ്യക്തിപോലും ജീവിക്കുന്നത് 80ല്‍ പരം വര്‍ഷങ്ങളാണ്. എന്നാല്‍ അതിലും കൂടുതലാണ് ഈ കാലയളവ്.

4) ''മലക്കുകളും റൂഹും (ജിബ്‌രീല്‍) ആ രാത്രിയില്‍ ഇറങ്ങിവരുന്നു.'' അതായത് ആ രാത്രിയില്‍ അവര്‍ ധാരാളമായി ഇറങ്ങുന്നു എന്നര്‍ഥം. ''എല്ലാ കാര്യത്തിലും.''

5) ''അത് സമാധാനമത്രെ.'' നന്മ ധാരാളമുള്ള രാത്രിയായതിനാല്‍ അത് അപകടങ്ങളില്‍ നിന്നും ദുരന്തങ്ങളില്‍ നിന്നും സുരക്ഷിതമായതാണ്. ''പ്രഭാതോദയം വരെ.'' അതിന്റെ ആരംഭം സൂര്യാസ്തമയത്തോടെയും അവസാനം പ്രഭാതോദയം വരെയും ആയിരിക്കും. ഈ രാത്രിയുടെ മഹത്ത്വത്തെ വിശദീകരിക്കുന്ന ധാരാളം നബിവചനങ്ങള്‍ വന്നിട്ടുണ്ട്. അത് റമദാനിലെ അവസാന പത്തില്‍ ഒറ്റയിട്ട രാവുകളിലാണ്. ഈ രാത്രി ലോകാവസാനം വരെ ആവര്‍ത്തിച്ച് കൊണ്ടിരിക്കും. അതുകൊണ്ടാണ് നബി ﷺ  ഈ രാത്രിയെ പ്രതീക്ഷിച്ചുകൊണ്ട് റമദാനിലെ അവസാന പത്തില്‍ പള്ളിയില്‍ ഇഅ്തികാഫ് ഇരിക്കുകയും ആരാധനകള്‍ വര്‍ധിപ്പിക്കുകയും ചെയ്തിരുന്നത്. (അല്ലാഹു അഅ്‌ലം).