മഴക്കാല ബാല്യം
അബൂഫായിദ
2018 സെപ്തംബര്‍ 01 1439 ദുല്‍ഹിജ്ജ 20
മഴയോമഴ മഴ പെയ്യുന്നു
പുഴയോപുഴ പുഴ നിറയുന്നു
ഇടിയോ ഇടി ഇടിയിടി നാദം
ചൊടിയോടെ കൂട്ടിനു മിന്നല്‍
കാറ്റോടി വരവായ് ഉടനെ
കൂറ്റോടെ വീശുകയായി
മൂവാണ്ടന്‍ മാവില്‍നിന്നും
ആവോളം മാങ്ങകള്‍ വീണു
പോക്കാച്ചി തവളകളുടനെ
പേക്രോം എന്നങ്ങനെ പാടി
മഴയല്‍പം നിന്നൊരു നേരം
ഇടിയും പോയ് കാറ്റും പോയി
മൂവാണ്ടന്‍ മാങ്ങ പെറുക്കാന്‍
ഓടുന്നു കുട്ടികളുടനെ
വീഴുന്നു തമ്മില്‍ തട്ടി
ബഹളങ്ങള്‍ കശപിശയായി
ഉയരുന്നു കളിചിരി നാദം
ബാല്യത്തിന്‍ കുതൂഹലഘോഷം