കുട്ടിയും പഞ്ചവര്‍ണക്കിളിയും
റാഷിദ ബിന്‍ത് ഉസ്മാന്‍
2018 ദുല്‍ക്വഅദ 15 1439 ജൂലായ് 28
കുട്ടി:
മൈലാഞ്ചിക്കൊമ്പിലിരുന്നു പാടും
പഞ്ചവര്‍ണക്കിളീ ചൊല്ലിടാമോ
പട്ടുപോല്‍ മിനുമിനുത്തുള്ള നിന്റെ
മേനിയില്‍ മെല്ലെ ഞാന്‍ തൊട്ടീടട്ടെ?
കിളി:
തൊട്ടുേനാക്കാനെന്നെ കിട്ടുകില്ല
കുട്ടീ നീ ദൂരത്തിരുന്നു കണ്ടോ
പാട്ട് ഞാനാവോളം പാടിത്തരാം
കേട്ടിരിക്കാനായി നേരമുണ്ടോ?
കുട്ടി:
കൂട്ടുകൂടാന്‍ നീ ഒരുക്കമെങ്കില്‍
പാട്ടെത്രയും കേട്ട് ഞാനിരിക്കാം
ഒട്ടും ഭയക്കാതെ പാറിവരൂ
കൂട്ടായിട്ടെന്‍ തോളില്‍ വന്നിരിക്കൂ
കിളി:
കൂട്ടുകൂടാനേറെ പൂതിയുണ്ടേ
കൂട്ടിലിടുമെന്ന പേടിയാണേ
കാട്ടിലും മേട്ടിലും പാറിപ്പാറി
കുട്ടീ ഞാനീവിധം ജീവിച്ചോട്ടെ