നിങ്ങളിനിയുമുറങ്ങുന്നുവോ?
ഉസ്മാന് പാലക്കാഴി
2018 ദുല്ക്വഅദ 08 1439 ജൂലായ് 21
വരിക വരികയീ
നാടിന്റെ നെഞ്ചകത്തെ
പിളര്ത്തി ചോരയൂറ്റി-
ക്കുടിച്ചു മദിച്ചിടാം
അന്യജാതിക്കാരന്റെ-
യന്യമതക്കാരന്റെ
അന്യപാര്ട്ടിക്കാരന്റെ-
യന്യദേശക്കാരന്റെ
അന്യഭാഷക്കാരന്റെ-
യന്യവീട്ടുകാരന്റെ
മേനിയില് കൊടുവാളാല്
ചുവന്ന പൂക്കള് തീര്ക്കാം
കുടലു ചോര്ത്തി കണ്ഠ-
മാലകള് ചാര്ത്തി ജയ് ജയ്
വിളിക്കാം വിജയത്തിന്
ചിഹ്നവും കാണിച്ചിടാം
പ്രശ്നമാക്കേണ്ട പേടി-
യൊട്ടുമേ വേണ്ട രക്ഷ
നല്കുവാന് മോളില് പിടി-
പാടുള്ളോരേെറയുണ്ട്
മതമേലാളന്മാരും
രാഷ്ട്രീയ പ്രഭുക്കളും
കാക്കിയിട്ടേമാന്മാരും
കാത്തിടും ഭയം വേണ്ട
ചുവപ്പ്, പച്ച, കാവി-
യിങ്ങനെ പല വര്ണ
കൊടികള്ക്കനുസൃതം
ചോരതന് നിറം മാറും
വിരുദ്ധ രക്തം തമ്മില്
ചേരില്ലയതിനാലെ
ഗ്രൂപ്പ് നോക്കണമന്യ
ഗ്രൂപ്പെങ്കില് വെട്ടാം തല
വയസിനെണ്ണം നോക്കി-
യത്രയും വെട്ടു നല്കാം
അന്ത്യചുംബനത്തിനായ്
ബാക്കിയാക്കല്ലേ മുഖം
നമ്മുടെ കൊല ധീര-
വീരമാം പ്രവര്ത്തനം
നാടിന്റെ ഗുണത്തിനായ്
തിന്മതന് വേരറുക്കല്
നമ്മളിലൊരാള് കൊല്ല-
പ്പെട്ടെങ്കിലത് കാടന്
ഭീകരപ്രവര്ത്തനം
വരമ്പത്തേകാം കൂലി...
'ഉണരൂ സമൂഹമേ
ഉണരൂ' യുവതയേ
മനുഷ്യ സൗഹാര്ദത്തിന്
വെളിച്ചം പരത്തുവാന്