മരണം വന്നണയുമ്പോള്‍
സ്വാദിക്വ് ഇബ്‌നു സലീം
2019 മാര്‍ച്ച് 16 1440 റജബ് 11
മരണം വന്നണയുമ്പോള്‍, മിഴി രണ്ടുമടയുമ്പോള്‍
കരയുവാന്‍ അടുത്തുണ്ട് നയനമേറെ-പക്ഷേ
ക്വബ്‌റിലെ സ്ഥിതി ഓര്‍ത്താല്‍ കരയും താനേ
വിടചൊല്ലി അകലുന്ന റൂഹതിന്റെ ഗതിനോക്കി
അധരങ്ങള്‍ വരളുന്നു ജലത്തിനായി-ചുണ്ടില്‍
പതിച്ചതീവിധം വയ്യ ഇറക്കുവാനേ
കരള്‍പൊട്ടിക്കരയുന്ന കുടുംബത്തില്‍ കരച്ചില്‍ ഞാന്‍
ഒരിക്കലും ശ്രവിക്കില്ല ശരിക്കും തീരെ-സ്വന്തം
മരണത്തിന്‍ സമയത്ത് തുണയില്ലാരും
ഒരുതുണ്ട് ചരടിനാല്‍ വിരല്‍ ചേര്‍ത്ത് തടയുന്നു
അധരങ്ങള്‍ അടച്ചിട്ട് ശിരസ്സില്‍ കെട്ടി-പിന്നെ
തുണി മൂടിപ്പുതച്ചെന്നെ കിടത്തി നീളെ
ക്വബ്‌റിലേക്കെടുക്കുവാന്‍ ഒരുക്കങ്ങള്‍ നടക്കുന്നു
മുഖം കണ്ട് മടങ്ങുന്നു പലരും വേഗം-എന്റെ
ഹയാത്തിലെ കറുപ്പെല്ലാം പൊറുക്കൂ കോനേ
ക്വബ്‌റിലെ അദാബുകള്‍; അതില്‍നിന്നും തുണയേകി
കബീറായ പുരാനെ നീ കരകേറ്റണെ-എന്റെ
ബറ്‌സഖില്‍ സമാശ്വാസം കനിഞ്ഞിടണേ
പരലോക ഭവനത്തില്‍ വിജയത്തിന്‍ വഴി നല്‍കി
ഫിറ്ദൗസില്‍ ഇടം നല്‍ക് റഹീമായോനെ-എന്റെ
മുറാദെല്ലാം ക്വബൂലാക്കി തരേണേ നീയേ