മഴക്കാല കാഴ്ചകള്‍
അബൂഫായിദ
2019 ജൂണ്‍ 29 1440 ശവ്വാല്‍ 26
മാരിക്കാറ് പരക്കുന്നു
മാനം കരിനിറമാകുന്നു
മഴതന്‍ മേളം മുറുകുന്നു
മാനവരാനന്ദിക്കുന്നു
പുഴയും തോടും കവിയുന്നു
കിണറില്‍ വെള്ളം നിറയുന്നു
പുതുപുതു നാമ്പുകളുയരുന്നു
പല്‍വര്‍ണപ്പൂ വിരിയുന്നു
കര്‍ഷകരാഹ്ലാദിക്കുന്നു
കൃഷിയില്‍ നന്നായ് മുഴുകുന്നു
കഷ്ടപ്പെട്ടവര്‍ പണിയുന്നു
കഷ്ടപ്പാടുകള്‍ മാറ്റുന്നു
കടലില്‍ തിരകള്‍ പൊങ്ങുന്നു
കരയില്‍ കേറിയടിക്കുന്നു
കുടിലുകള്‍ പലതും തകരുന്നു
കടുത്ത ദുരിതം നിറയുന്നു
ഇടിയും മഴയും പെരുകുന്നു
ഇടയില്‍ മിന്നല്‍ മുറുകുന്നു
മിന്നല്‍ അപകടമാകുന്നു
മരണം പോലും വിതറുന്നു
മഴപെയ്താല്‍ വന്നെത്തുന്നു
രോഗങ്ങള്‍ തലപൊക്കുന്നു
കൊതുകുകളെങ്ങും വളരുന്നു
ജാഗ്രത നമ്മള്‍ കാട്ടുന്നോ?
മഴയും വെയിലും ഇടിയും മിന്നല്‍
കൊണ്ടുവരുന്നവനല്ലാഹു.
ഗുണമത് കിട്ടാന്‍ തേടുക നാം
ദോഷം തടയാന്‍ തേടുക നാം