ലഹരിയിലേക്കെത്തുന്ന വഴികള്‍
പ്രൊഫ: ഹാരിസ്ബിന്‍ സലീം
2017 ഡിസംബർ 16 1439 റബിഉല്‍ അവ്വല്‍ 27
ഉത്തരം: ഇനി എന്ത് ചെയ്യും എന്ന ചോദ്യത്തെക്കാളും നേരത്തെ മനസ്സിലാക്കുവാന്‍ കഴിഞ്ഞില്ല എന്നതാണ് ഗൗരവപരമായി കാണേണ്ടത്. ഇസ്‌ലാമിക ശരീഅത്തിന്റെ തന്നെ അടിസ്ഥാനങ്ങൡലൊന്നാണ് തെറ്റിലേക്കുള്ള വഴി അടയ്ക്കല്‍ (സദ്ദു ദരീഅത്ത്). അന്യ സ്ത്രീ പുരുഷന്മാര്‍ തമ്മിലുള്ള നോട്ടത്തെ വിരോധിച്ചത് വ്യഭിചാരത്തിലേക്ക് എത്താതിരിക്കുവാനാണ്. കാരണം എത്തിക്കഴിഞ്ഞ ശേഷം പിന്‍വാങ്ങല്‍ പ്രയാസകരമാണ്. പാപരഹിതമായി ജീവിക്കുവാനും അത് സഹായിക്കും. സ്ത്രീയും പുരുഷനും ഒറ്റയ്ക്കാവാന്‍ പാടില്ലെന്ന നിയമവും സ്ത്രീകളുടെ ഹിജാബുമെല്ലാം ഇതില്‍ ഉള്‍പെടും. ലഹരിയിലേക്കെത്തുന്ന സാഹചര്യങ്ങളെ ഇതിലേറെ ഗൗരവമായി നാം കാണണം.
മൂന്ന് സുഖങ്ങളാണ് ഏതൊരു മനുഷ്യനെയും പെട്ടെന്ന് സ്വാധീനിക്കുന്നത്. ഒന്ന് വിനോദങ്ങളാണ്. ഇന്നത്തെ ഭാഷയില്‍ പറഞ്ഞാല്‍ ഗെയിമുകള്‍. ആളുകളെ ആത്മഹത്യയിലേക്ക് വരെ എത്തിക്കുന്ന ഭീകരാവസ്ഥയിലേക്ക് ചില ഗെയിമുകള്‍ എത്തിക്കഴിഞ്ഞു. രണ്ടാമത്തേത് ലൈംഗികതയാണ്. ഏതെങ്കിലും തരത്തില്‍ ഇത് ആസ്വദിക്കുന്നവരാണ് വലിയൊരു വിഭാഗം. മൂന്നാമത്തേതാണ് ലഹരിയുടെ സുഖം. പുകവലിയും മുറുക്കും പാന്‍പരാഗും ഇഞ്ചക്ഷനും ഗുളികകളും പാമ്പിനെക്കൊണ്ട് നാവില്‍ കൊത്തിക്കുന്നതുമടക്കം ലഹരിയുടെ എന്തെല്ലാം വഴികള്‍! അവസാനം ഉരുകിത്തീരുന്നു. വൈറ്റ്‌നര്‍ അടക്കം പല സ്‌റ്റേഷണറി സാധനങ്ങളും ചില മരുന്നുകളും മക്കള്‍ ലഹരിക്കായി ഉപയോഗിക്കുന്നു എന്ന കാര്യം അധികം രക്ഷിതാക്കള്‍ക്കുമറിയില്ല. ലഹരി വസ്തുക്കള്‍ സുലഭമായ ഇക്കാലത്ത് രക്ഷിതാക്കള്‍ അതീവ ജാഗ്രത പുലര്‍ത്തേണ്ടതുണ്ട്. ലഹരിയിലേക്കെത്തുന്ന ചില കാരണങ്ങള്‍ കുറിക്കട്ടെ:
1. വളരെ ചെറുപ്രായത്തില്‍ ശ്രദ്ധിക്കേണ്ട കാര്യം ആദ്യം പറയാം: കൃത്രിമ രുചിയള്ള ആഹാരങ്ങള്‍ കഴിവതും കുട്ടികളെ ശീലിപ്പിക്കാതിരിക്കുക. എന്തും രുചിച്ച് നോക്കുവാനും ഏത് രുചിയുമായും ഇണങ്ങുവാനും അത് മൂലം കുട്ടികള്‍ക്ക് സാധിക്കുന്നു. ഇത് ലഹരിയുണ്ടാക്കുന്ന വസ്തുക്കളുടെ ഉപയോഗത്തിലേക്ക് എത്തിച്ചേക്കാം.
2. പുകവലി പലരെയും ലഹരിയിലേക്ക് എത്തിച്ചിട്ടുണ്ട്. പ്രത്യേകിച്ച് കഞ്ചാവിന്റെ ഉപയോഗത്തിലേക്ക് എത്താന്‍ അത് എളുപ്പവഴിയാണ്. പുകവലിക്കുന്ന സ്വഭാവം കണ്ടുകഴിഞ്ഞാല്‍ അത് മാറ്റിയെടുക്കുവാനുള്ള ബുദ്ധിപൂര്‍വമായ ഇടപെടല്‍ വലിയ ദുരന്തങ്ങളെ ഒഴിവാക്കും.
3. ലഹരി ഉപയോഗിക്കുന്ന കൂട്ടുകാരോടൊപ്പമുള്ള സഹവാസമാണ് പലരെയും ലഹരിയിലേെക്കത്തിക്കുന്നത്. 'ഞാന്‍ ഉപയോഗിക്കാതിരുന്നാല്‍ പോരേ' എന്ന് ചോദിച്ച പലരും പിന്നീട് ലഹരിയിലേക്ക്എത്തിയിട്ടുണ്ട്.
4. ലഹരി ഉപയോഗിക്കുന്ന മാതാപിതാക്കളാണ് മറ്റൊരു കാരണം. മക്കള്‍ ലഹരിയെക്കുറിച്ച് മനസ്സിലാക്കുവാനും അത് തെറ്റായി കാണാതിരിക്കുവാനും അത് വഴിവെക്കുന്നു.
5. ആവശ്യത്തിലധികം പണം കയ്യില്‍ വരുന്നതും ലഹരി വസ്തുക്കള്‍ വാങ്ങി ഉപയോഗിക്കുന്നതിലേക്കും ചീത്ത കൂട്ടുകാര്‍ കൂടെ കൂടുന്നതിനും കാരണമാകുന്നു.
6. സിനിമകളും സീരിയലുകളും ലഹരിയിലേക്കെത്തിക്കുന്നതില്‍ ചെറുതല്ലാത്ത പങ്ക് വഹിക്കുന്നുണ്ട്.
7. ഏത് തരത്തിലുള്ള ആഘോഷവേളകളിലും പരീക്ഷിക്കുന്ന തിന്മകളുടെ കൂട്ടത്തില്‍ മദ്യം പ്രധാനമാണ്.
8. കുട്ടികളെ ദുരുപയോഗം ചെയ്യുന്നവരുടെ ആയുധവും ലഹരിവസ്തുക്കളാണ്.
ലഹരി ഉപയോഗിക്കുന്നവരെ മാറ്റിയടുക്കുവാന്‍ പ്രഥമവും പ്രധാനവുമായി വേണ്ടത് സ്‌നേഹോപദേശമാണ്. അല്ലാഹുവിനെപ്പറ്റിയും പരലോകത്തെപ്പറ്റിയും ഓര്‍മിപ്പിക്കുന്ന ജീവിതത്തിന്റെ യഥാര്‍ഥ ലക്ഷ്യത്തെപ്പറ്റി ബോധവല്‍ക്കരിക്കുന്ന ഹൃദ്യമായ ക്ലാസുകളില്‍ പങ്കെടുപ്പിക്കുക എന്നതും ഒരു പരിഹാരമാണ്. മാതൃകാപരമായി നടക്കന്ന ഡി അഡിക്ഷന്‍ സെന്ററുകളും പ്രയോജനപ്പെടുത്താം.