ഒരു കുഞ്ഞുവസ്വിയ്യത്ത്
ഹുസ്ന മലോറം
2023 ഒക്ടോബർ 28 , 1445 റ.ആഖിർ 13
മരണം പടിവാതിൽക്കൽ
എത്തിയതിനാലാവാം
ആ കുഞ്ഞുമനസ്സ്
ഒടുവിലത്തെ വരി
കുറിച്ചിട്ടത്.
ഒരുക്കൂട്ടിവെച്ച
ചില്ലറക്കാശുകൾ
പേരെടുത്തു പറഞ്ഞ്
അവൾ വിഹിതം വെച്ചു.
കുഞ്ഞു കളിപ്പാട്ടങ്ങളും
മറ്റുള്ളവയും
കൂടെപ്പിറപ്പിനും
കൂടെ പിറക്കാത്ത
കൂടെപ്പിറപ്പുകൾക്കും.
വസ്ത്രങ്ങൾ
പ്രിയപ്പെട്ടവർക്ക്,
ബാക്കിയുണ്ടേൽ
ആവശ്യക്കാർക്കും.
കുഞ്ഞു ചെരുപ്പുകൾ
പാവപ്പെട്ടവർക്ക്
കൊടുത്തേക്കുക;
ചെളി കളഞ്ഞ്
ശുദ്ധിയാക്കിയിട്ട്...!
കുഞ്ഞേ...
നീ ഒരു തുണ്ടുകടലാസിൽ
കോറിയിട്ട
നിന്റെ വസ്വിയ്യത്ത്
വായിച്ചാൽ
കണ്ണുകൾ നിറയാത്ത
ആരുണ്ട്?
ചോരയുടെ മണമുള്ള
നാട്ടിൽ നിന്ന് നീ
യാത്രയായോ...?
എങ്കിൽ നീയെത്ര ഭാഗ്യവതി!