2019 ഏപ്രില്‍ 27 1440 ശഅബാന്‍ 22

മരണാനന്തരം?

മുബാറക്ബിന്‍ ഉമര്‍

എണ്ണിയാലൊടുങ്ങാത്ത അക്രമങ്ങളും അനീതിയുമാണ് സമൂഹത്തില്‍ നടന്നുകൊണ്ടിരിക്കുന്നത്. പലതും പിടിക്കപ്പെടുന്നു. എന്നാല്‍, പിടിക്കപ്പെടാത്തതും ആരാണ് ചെയ്തത് എന്ന് തിട്ടപ്പെടുത്താന്‍ കഴിയാത്തതുമാണ് ഭൂരിഭാഗവും. ചിലപ്പോഴെങ്കിലും നിരപരാധികള്‍ ശിക്ഷിക്കപ്പെടുന്നു; അപരാധികള്‍ രക്ഷപ്പെടുന്നു. കിട്ടിയ ശിക്ഷയാവട്ടെ പൂര്‍ണമല്ല താനും. എന്താണ് കുറ്റം ചെയ്തവര്‍ക്കുള്ള ആത്യന്തിക ശിക്ഷ? നിരപരാധികളെന്ന് കണ്ട് നീണ്ട വര്‍ഷത്തെ തടവിന് ശേഷം വിട്ടയക്കപ്പടുന്നവര്‍ക്ക് എന്ത് നഷ്ടപരിഹാരം നല്‍കിയാലാണ് അനുഭവിച്ച പ്രയാസങ്ങള്‍ക്ക് പകരമാവുക? തെല്ലും പക്ഷപാതിത്വമില്ലാതെ, നീതിയുക്തമായ പരിഹാരം നിര്‍ദേശിക്കാന്‍ സൃഷ്ടിച്ച സ്രഷ്ടാവിനേ കഴിയൂ. അതിന് മരണാനന്തര ജീവിതവും പരലോകത്തെ രക്ഷ-ശിക്ഷാ വിധികളും മാത്രമെ ഉപകരിക്കൂ.