2024 ജൂൺ 08, 1445 ദുൽഹിജ്ജ 01

ത്രസിപ്പിച്ച് ‘ഇന്ത്യ’ താക്കീത് നൽകി ഭാരതം

സുഫ്‌യാൻ അബ്‌ദുസ്സലാം

അധികാരദുർവിനിയോഗത്തിനും അഴിമതിക്കും വർഗീയതക്കുമേറ്റ ശക്തമായ തിരിച്ചടിയാണ് ലോക്‌സഭാ തെരഞ്ഞെടുപ്പ് ഫലം. ജനാധിപത്യത്തെയും മതനിരപേക്ഷതയെയും കാറ്റിൽപറത്തി സ്വേച്ഛാധിപത്യത്തിന്റെ നഖങ്ങളായിരുന്നു കഴിഞ്ഞ പത്തുവർഷം രാജ്യത്തെ അടക്കിഭരിച്ചത്. മതസ്വാതന്ത്ര്യത്തെ ഗളഹസ്തം ചെയ്തും സ്വതന്ത്രമായ അഭിപ്രായപ്രകടനങ്ങളെ ഉന്മൂലനം ചെയ്തും പ്രതിപക്ഷ സ്വരങ്ങളെ ഇല്ലാതാക്കിയും രാജ്യത്തെ ഒരു ഹിന്ദുത്വ രാഷ്ട്രമാക്കാനുള്ള ശ്രമങ്ങളായിരുന്നു ഇതുവരെയും കണ്ടത്. ഇന്ത്യൻ ജനതയുടെ കരുത്തുറ്റ ജനാധിപത്യ ബോധത്തിന് മുന്നിൽ അവയെല്ലാം തകർന്നു തരിപ്പണമായി. ഇന്ത്യാ മുന്നണി രാജ്യത്തെ ത്രസിപ്പിച്ചിരിക്കുന്നു. മതനിരപേക്ഷ മണ്ണിനെ നെറുകെ പിളർത്താനുള്ള സംഘ്പരിവാറിനുള്ള ശക്തമായ താക്കീതാണ് ഭാരതം നൽകിയിരിക്കുന്നത്.